1Th 4 | EMI | STEP | Liuna avalua o, kapuimami etoa, me ami ghe loeamla vaalua tani toka tani amasimasi God, me tokatokaaimim nau ghaine am usila. Me isaa oia ami kookolomiem me ami aulia ngasarasarakana etaimim ta Vau ngepona ateva Iesu tani gheleiem va am toka tale ia o ase nitoka ateva nau ekapa atoa.

1 Thessalonians 4

Ita toka tani amasimasi God

1 Liuna avalua o, kapuimami etoa, me ami ghe loeamla vaalua tani toka tani amasimasi God, me tokatokaaimim nau ghaine am usila. Me isaa oia ami kookolomiem me ami aulia ngasarasarakana etaimim ta Vau ngepona ateva Iesu tani gheleiem va am toka tale ia o ase nitoka ateva nau ekapa atoa. 2 Poli am kilakila saa inangari niloeloe ami ghe tau aatu sio etaimim, me isaa o inangari, matuutuliena ghe mae sio ta Vau ngepona ateva Iesu.

3 Aloaloanaane God etaimim va am manga, me am akekkeliem tale ase niailai etoa karika elaolao tale uungua nilai emasina. 4 Kateva kateva etaimim etani kila vaalua tani ainanganangaa vilikina tale salana manga me nioneonea, 5 karika va tale sesa ninannaa emuemueiniem am gheelei, nongina taumattu ngeleka atoa karika la kilakila God. 6 Me tale isaa o voto karika teva emene ghelei saasakia ta teva kapuna, o ekamea me eghaa peina. Vau ngepona ateva aue liu aipolipoli sesa tale ia o ase taumattu ngateva, poli isaa o ase ssavoto, nongina ngami ghe aulia amuela, me ngami mene aulia ngasarasarakana. 7 Poli God karika va ghe kolotala tani tam raarangisana ta ita toka va manga maamauluaaita. 8 Liuna avalua o me lo ateva erati isaa o inangari niloeloe, karika va eratirati taumattu, ta eratirati God, ia etautau aatu kapuna Spirit Manga ateva.

9 Me tani ailousia mene katoa tau ngaiesoa, karika righi uunguaaimami tani mene pitipiti me aulia etaimim, poli God angghe apasungaala etaimim vaalua tani aielousia mene kateva. 10 Me koronnaaili, am, am aielousia kapuita akapa atoa eMesedonia, me, kapuimami etoa, ami mene aulia ngasarasarakana tani gheleiem va am toka tale ia o ase nitoka ateva nau ekapa atoa.

11 Am gheleia va ekateva voto namuu ia tale maamauluaaimim tani toka tale luei, me am annaa nonga uunguaaimim, me am uungu aanasa nongina ami ghe auliaala etaimim. 12 Me aue tokatokaaimim tale nau ekapa aue lo atoa eleka la oneoneainam, me am rau mene nim toka, me am anna va katoa la ghelei tau aatu voto am aaloanna.

Maemaeaane Vau ngepona ateva

13 Kapuimami etoa, ami anna va am kila saa ateva aue lutu ta lo atoa la nim aseasekanua tale nimate, me aue am tam alousiusi nongina taumattu ngakapa atoa poli karika la kilakila va mene teva maulue auena. 14 Ita aiesoa va Iesu ghe matela me ghe mene totula, me ita aiesoa tee va God aue maeaa Iesu tee lo atoa laghe asekanuela tale aikaaiaaira ta Iesu. 15 Nongina inangarina Vau ngepona ateva, ami aulia etaimim va lo atoa ita tokatoka, karika ita ghe mate me Vau ngepona ateva aue emae, karika aue ita kasu ekasina ta lo atoa la aseasekanua. 16 Ta ia Vau ngepona ateva Iesu aue ekasu epona liu tee kinatama nikolokolo ateva sarasarakanaaili ia, me tee lingi ngalona ateva kapuira namu ngateva ensolo atoa, me nikolokolo ateva tale unna taue ateva God, me lo atoa laghe aikaaiaala ta Iesu me laghe matela aue la totu ekasina. 17 Vara me lo atoa ita tokatoka, karika ita ghe mate, aue ita sae aitaua teeila tale uru kookoo tani sou Vau ngepona ateva elomarase, me aue ita toka tee Vau ngepona ateva nau ekapa atoa. 18 Liuna avalua o me am aippooa tale inangari niaisausi tale kateva kateva etaimim tale isaa oia inangari tale maemaeaane Vau ngepona ateva.